main ne pucha pahla patthar mujh par kaun uthayega

main ne pucha pahla patthar mujh par kaun uthayega

میں نے پوچھا پہلا پتھر مجھ پر کون اٹھائے گا

آئی اک آواز کہ تو جس کا محسن کہلائے گا

پوچھ سکے تو پوچھے کوئی روٹھ کے جانے والوں سے

روشنیوں کو میرے گھر کا رستہ کون بتائے گا

ڈالی ہے اس خوش فہمی نے عادت مجھ کو سونے کی

نکلے گا جب سورج تو خود مجھ کو آن جگائے گا

لوگو میرے ساتھ چلو تم جو کچھ ہے وہ آگے ہے

پیچھے مڑ کر دیکھنے والا پتھر کا ہو جائے گا

دن میں ہنس کر ملنے والے چہرے صاف بتاتے ہیں

ایک بھیانک سپنا مجھ کو ساری رات ڈرائے گا

میرے بعد وفا کا دھوکا اور کسی سے مت کرنا

گالی دے گی دنیا تجھ کو سر میرا جھک جائے گا

سوکھ گئی جب آنکھوں میں پیار کی نیلی جھیل قتیلؔ

تیرے درد کا زرد سمندر کاہے شور مچائے گا

main ne pucha pahla patthar mujh par kaun uthayega

ai ik awaz k tu jis ka mohsin kahlayega

puch sake to puche koi ruth k jane walon se

roshaniyon ko mere ghar ka rasta kaun batayega

logo mere sath chalo tum jo kuch hai wo age hai

piche mur kar dekhne wala patthar ka ho jayega

din mein hanskar milne wale chehre saf batate hain

ek bhayanak sapna mujh ko sari rat darayega

mere bad wafa ka dhoka aur kisi se mat karna

gali degi duniya tujh ko sar mera jhuk jayega

sukh gai jab in ankhon mein pyar ki nili jhil 'Qateel'

tere dard ka zard samandar kahe shor machayega